Meän tehtävä

Instityytti ihmisoikeuksille perustethiin 1 tammikuuta 2022 Ihmisoikeuksitten instityytin lain kautta.

Meän työn lähtökohta oon:

• Ruottin peruslait (hallitusmuoto, painovaphaussääntely ja sananvaphausperuslaki)
• Eurooppalainen konvensuuni ihmisoikeuksitten suojasta (EKMR)
• FN:in konvensuunit muista ihmisoikeussopimuksista joihiin Ruotti oon allekirjottanu.

Meän tehtävät lain mukhaan

Ihmisoikeusinstityytin laki määrää meän työn rajoista. Met päätämä itte meän suunasta ja meän tehtävistä näitten rajoitten sisäpuolela. Hallitus ja valtiopäivät ei siis saata antaa meile lisätehtäviä.

Lain mukhaan met piämä:

• Seurata, tarkastaa ja ilmottaa millä laila ihmisoikeuksia kunniotethaan Ruottissa.
• Ehottaa toimenpitheitä hallitukselle ette parantaa ihmisoikeuksitten suojaa.
• Olla matkassa kansanvälisessä yhtheistyössä ja pittää yhtheyttä kansanvälisitten organisasuunitten kansa.
• Etistää koulutusta, tutkimusta, kompetensikehitystä ja lisätä tietosuutta ihmisoikeuksista.
• Jättää hallitukselle vuosittaisen raportin jossako met kuvvaama ihmisoikeuksitten tilanetta, kunka net vuen aikana oon kehittynheet Ruottissa ja antaa suositteluja kunka oikeuksitten saatavuutta mennee vahvistaa.

Met emmä tutki yksittäisiä ilmotuksia loukkauksista. Meän keskustelu oikeushenkilöitten kansa oon kuitenki keskheistä siittä ette ottaa esile ehotuksia kunka ihmisoikeuksia saatethaan vahvistaa käytänössä.

Ette meän tehtävät oon päätetty laissa – ja ette niitä vain saata muuttaa valtiopäivitten päätöksitten kautta – antaa meile ittenhäisen, voimakhaan ja tukevan pohjan meän työssä ihmisoikeuksille. Meän ittenhäisyys oon ratkaseva – se antaa meile voiman ja vaphauen ette tarkastaa päättäjiä ilman hallituksen elikkä muitten intressitten vaikutusta.

Lue lissää meän työstä

Erityinen vastuu henkilöistä joilako oon toimintaeste

Ihmisoikeuksitten instityyilä oon erityinen tehtävä ette etistää oikeuksia henkilöile joilako oon toimintaeste ja seurata ylös kunka Ruotti nouattaa toimintaoikeuskonvensuunia. Meilä oon tämä tehtävä koska met olema Ruottin riippumaton instansi jotako kuvathaan artikkelissä 33.2 FN:in konvensuunissa oikeuksista henkilöile joilako oon toimintaeste.

Toimintaoikeuskonvensuunissa, artikkeli 33.2 seisoo ette jokhaisella maala, joka oon kirjottannu konvensuunin alle, pittää olla yks elikkä useampi instansi jokka valvovat kunka maa nouattaa konvensuunia. Nämät instansit pitävät olla riippumattomat ja tehhä yhtheistyötä henkilöitten kansa joilako oon toimintaeste ja niitten ihmisitten organisasuunitten kansa.

Meän työ toimintaoikeuksitten kansa

Parisiprinsiipitten mukhainen ittenhäisyys

Tärkeä tarkotus meän toiminan kansa oon ette Ruottila pittää olla kansalinen institysuuni ihmisoikeuksille joka nouattaa Parisiprinsiippiä – FN:in kansanväliset suuntaviivat kunka semmoset institysuunit pitävät toimia.

Parisiprinsiipit vahvistavat ette ihmisoikeusinstitysuuni pittää:

• olla riippumaton hallituksesta
• saaja selvän tehtävän laissa
• tehhä työtä laajasti ihmisoikeuksitten aluheela
• olla laaja eustus siviliyhtheiskunnalta
• käyttää tehokhaita ja riippumattomia työtapoja.

Met saima niin sanotun A-staattyksen lokakuussa 2024. Se oon korkein tunnustustaso jonka kansalinen institysuuni ihmisoikeuksille saattaa saaja, ja se tarkottaa ette met totheutamma Parisiprinsiippiä. Se tarkottaa kansa ette met olema täysarvoset jäsenet ja ette meilä oon äänestysoikeus klupalissa aliansissa GANHRI:ssä.

Vuona 2025, 91maissa oli kansalisia MR-instistysuunia jokka kokohnaans täytit Parisiprinsiippiä. FN kehottaa kaikkia maita pithään semmosta riippumatonta institysuunia.

Lue lissää Parisiprinsiipistä ja A-staattyksestä (på svenska)