Meän työ

Vuosiraportti oikeuksitten asenosta Ruottissa

Met julkasemma joka vuosi yhen vuosiraportin jonka lähätethään hallitukselle ja valtiopäivile. Raportissa met kuvvaama ihmisoikeuksitten tilanetta, kunka net oon kehittynheet Ruottissa vuen aikana ja annama suositteluja kunka oikeuksia saattaa vahvistaa. Raportti oon tärkeä työkalu ette seurata kehitystä aijan olhoon ja se pittää toimia tukena olletikki hallitukselle ja valtiopäivile mutta kansa muile julkisille aktöörille jokka pitävät varmistaa ette Ruotti nouattaa kansanvälisiä sitomuksia.

Lue meän viimistä vuosiraporttia (på svenska)

Tarkastamma kunka oikeuksia kunnioitethaan käytänössä

Met seuraama huolelisesti kunka oikeuksia tyytytethään Ruottissa, analyseeraamalla lakia, ehotuksia ja kaytäntöä. Meän fuukkys oon ette itenttifieerata ja käsittää kunka nämät toiminat vaikuttavat eri ryhmiä, ja ette käyttää meän analyysiä ette ehottaa konkreettiä parantamisia.

Raporttia kansanvälishiin valvontavirasthoin

Met eesautama FN:in tarkastusproseshiin paralelliraportitten kautta, jokka kompleteeraavat valtion julkista raporteerinkiä ja tekevät näkyviksi oikeussuojan puutheita. Antamalla riippumattoman analyysin met autama FN:in valvontakomiteata saahmaan enämpi vaihtelevan kuvan kunka ihmisoikeuksia nouatethaan Ruottissa. Se vahvistaa oikeusomistajitten ääniä ja auttaa muutoksitten painostamista.

Meän omat tarkastukset

Paitti kansanväistä ilmotusta met julkasemma omia tarkastuksia, analyysiä ja lausuntoja aktyellilä oikeusaluheila. Net saattavat olla kaikista, lapsitten oikeuksista sosiaalipalvelussa. Mutta net saattavat kansa olla vanheemitten henkilöitten ihmisoikeuksitten saatavuuesta vanheempainhuolossa. Riippumatta mistä aluheesta oon kyse niin fuukkys oon sama – ette itenttifieerata puutheita ja tehhä näkyviksi ihmisoikeuksitten konsekvensiä ja ehottaa ratkasuita suositteluina.

Meän tarkastukset ja raportit

Valvoma Ruottin työtä toimintaoikeuskonvensuunista

Ihmisoikeusinstitysuunila oon erityinen tehtävä ette etistää, suojata ja valvoa ette Ruotti nouattaa FN:in konvensuunia henkilöile joilako oon toimintarajotus.

Met tehemä sen esimerkiksi:

• tutkimalla eri kysymyksiä ihmisoikeuksista temattisissa tutkinoissa, joka vuosi seuraamalla ylös kunka Ruottila mennee ette totheuttaa oikeuksia toimintaoikeuskonvensuunin ja FN:in suositteluitten mukhaan,
• antamalla neuvoja ja suositteluja hallitukselle ja muile aktöörille kunka paremin varmistaa oikeuksia,
• kansanvälisen yhtheistyön kautta muitten ihmisoikeusinstityytitten ja FN:in kansa.

Met tehemä aktiivisti töitä henkilöitten kansa joilako oon toimintarajotus ja niitten organisasuunitten kansa. Työ perustuu meän erityisheen tehtävhään ette etistää, suojata ja valvoa toimintaoikeuskonvensuunin yli ja meän ylheisheen tehtävhään ette etistää ihmisoikeuksitten varmistamista Ruottissa. Ette suorittaa tehtävvää met olema ottanheet esile vuosittaisen työstryktyyrin. Se auttaa meitä tekheen töitä enämpi systemaattisesti ja pitkänaikhaisesti ette muun muassa saaja osalistumhaan henkilöitä joilako oon toimintarajotus ja niitten organisasuunia selvemällä laila.

Levitämmä tietoa ihmisoikeuksista

Tieto oon etelytys ette met saatama etistää ja suojata ihmisoikeuksia. Sen takia met tehemä töitä usealla laila ette saaja tietoa asihaankuuluville aktöörille esimerkiksi meän raportitten ja suositteluitten kautta.

Päämäärä oon ette antaa niin ylheishöön kuuluville oikeushenkilöile ja ammattilisille velvolisuushenkilöile paremat etelytykset ette käsittää ja käyttää ihmisoikeuksia arkipäivässä.

Rakenamma verkostoja ja piämä keskusteluja muutoksille

Siviliyhtheiskunnala oon keskinen rolli yhtheiskunnan kehityksessä ja ette ylläpittää temokratiita ja ihmisoikeuksia. Net toimivat kansa ruuhojuuritasola ja sen kautta heilä oon paikalista informasuunia joka piiain ei ole helpposaatavvaa meile. Sen takia keskustelut siviliyhtheiskunnan ja yksityisitten oikeushenkilöitten kansa oon keskisiä meän työssä ja ratkasevia ette met saatama ymmärtää kunka yhtheiskuntatason puutheet saavat seurauksia ihmisitten maholisuuksille ette saattaa käyttää heän ihmisoikeuksia. Meilä oon kansa tärkeitä keskusteluja elikkä yhtheistöitä virastoitten, tutkijoitten ja muitten aktööritten kansa.

Tekemällä töitä eri verkostoitten kansa met saatama niin jakkaa meän tietoa ja eesauttaa itenttifieeraahmaan yhtheisiä haastheita ja ratkasuja. Yks meän verkostoista oon suunattu henkilöile jokka oon töissä ihmisoikeuksitten kansa julkisella elikkä iteakantavalla sektorilla, elikkä jokka tekevät vapaehtosta työtä aluheela.

Katto tulevia verkostokokkouksia meän kalenterissä

Yhtheistyössä kansanvälisesti ette vahvistaa oikeuksia Ruottissa ja kansanvälisesti

Meilä oon aktiivi yhtheistyö kansanvälisitten orgaanitten ja sisarinstitysuunitten kansa muissa maissa. Vaihettamalla kokemuksia ja osalistumalla kansanvälisissä yhtheyksissä met eesautama klupaahliin työhöön ette suojata ja kehittää ihmisoikeuksia. Se vahvistaa kansa Ruottin rollia aktöörinä kansanvälisessä oikeusyhtheistyössä.

Met autama kansa kansanvälisiä tarkistusorgaania toimittamalla informasuunia ja kontaktia ennen maanvierailuja esimerkiksi Eurooppalaisele komisuunile rasismiä ja intuleransia vasten (ECRI) elikkä FN:in erityisraportöörile.

Jätämä remissivastauksia ja kirjotuksia ette vaikuttaa päätösottamista

Met jätämä kansa säänölisesti remissivastauksia ja kirjotuksia hallitukselle ja virastoile. Niitten lausunoitten kautta met halvaama vaikuttaa laitten, stratekiitten ja muitten päätöksitten muotostamista, joilako oon suuri merkitys ihmisoikeuksille. Meän suosittelut rakentautuvat analyyshiin kunka oikeuksia tyytytethään käytänössä ja tähtäävät siiheen ette estää loukkauksia ja vahvistaa oikeussuojaa.

Remissivastaukset rakentautuvat meän ekspertiishiin ihmisoikeuksista ja saattavat koskea kaikkia, uuesta lakisäätäntämisestä praksiksen muutokshiin elikkä pollishiin jokka vaikuttavat intiviititten oikeuksia arkipäivässä.

Meän remissivastaukset

Valasemma oikeuen tuomioistuintutkimuksheen ihmisoikeusperspektiivistä

Instityytti ihmisoikeuksille saattaa kansa lähättää sisäle amicus vastauksen Korkeimphaan tuomioistuihmeen. Tarkotus amicus-vastauksen kansa oon ette meän mantaatila eesauttaa valasheen oikeutta tuomioistuintutkimuksheen lähtien ihmisoikeusperspektiivistä.

Met tehemä muutaman amicus-vastauksen vuessa. Meän tehtävä ei ole ette tutkia yksittäisiä ilmotuksia ihmisoikeusloukkauksista.